O‘zbekistonda kollej va texnikumlar uchun kontrakt narxlari belgilandi

| 2021-04-12 17:50 | olarx olarx

O‘zbekistonda 2020/2021-o‘quv yilidan boshlab kollej va texnikumlarda tayyorlov yo‘nalishlari kesimida to‘lov-kontrakt asosida bir o‘quvchini o‘qitish qiymati tasdiqlandi. Bu haqda Oliy va o‘rta maxsus ta’lim vazirligi xabar berdi.

Unga ko‘ra, sog‘liqni saqlash, pedagogika, biznes va boshqaruv, san’at, ijtimoiy ta’minot, xizmat ko‘rsatish, jurnalistika va ijtimoiy axborot yo‘nalishlari uchun bir o‘quvchini o‘qitish qiymati mehnatga haq to‘lashning eng kam miqdori (9-oktabr holatiga ko‘ra 679 330 so‘m) 6,2 barobarida (4 211 846 so‘m) bo‘ladi.

Tabiiy fanlar, transport, muhandislik ishi, aloqa va axborotlashtirish, telekommunikatsiya texnologiyalari, kompyuter texnologiyalari va informatika, gumanitar fanlar (televideniye yo‘nalishi) yo‘nalishlari uchun mehnatga haq to‘lashning eng kam miqdori 6,0 barobarida (4 075 980 so‘m) belgilandi.

Qishloq xo‘jaligi irrigatsiyasi va melioratsiyasi, qishloq, o‘rmon va baliq xo‘jaligi, ishlab chiqarish va qayta ishlash tarmoqlari, arxitektura va qurilish, hayotiy faoliyat xavfsizligi, qishloq xo‘jaligi texnikasi, veterinariya, atrof-muhit muhofazasi yo‘nalishlarida o‘qitish qiymati mehnatga haq to‘lashning eng kam miqdorining 5,8 barobarida (3 940 114 so‘m) bo‘ladi.

Xabarda aytilishicha, mehnatga haq to‘lashning eng kam miqdori oshirilganda to‘lov-kontrakt qiymati miqdorlari navbatdagi o‘quv semestri boshida mos ravishda oshiriladi.

Manba daryo.uz